മഴതോരാത്ത പഞ്ഞക്കര്‍ക്കടകത്തില്‍ ആരോഗ്യവും പ്രതിരോധശേഷിയും ക്ഷയിക്കുമെന്നാണ്‌ പണ്ടുള്ളവര്‍ വിശ്വസിച്ചിരുന്നത്‌. കഴിഞ്ഞ ഒരു കൊല്ലത്തെ ജീവിതം കൊണ്ട് ശരീരത്തിനുണ്ടായ ആന്തരികവും ബാഹ്യവുമായ ക്ഷതങ്ങള്‍ക്ക്‌ ഒരു മാസത്തോളം നീളുന്ന ഔഷധക്കഞ്ഞിസേവ പരിഹാരമാകുമെന്ന് അവര്‍ കരുതി
ദാരിദ്ര്യം ചുരമാന്തുന്ന പഞ്ഞമാസത്തില്‍ ചുറ്റും കാണുന്ന ഔഷധങ്ങള്‍ ചേര്‍ത്ത്‌ കഞ്ഞിവച്ചു കുടിച്ചും ആരോഗ്യം സംരക്ഷിക്കാമെന്ന് നമ്മുടെ പൂര്‍വ്വികര്‍ വിശ്വസിച്ചു. ആ വിശ്വാസത്തെയും സ്വജീവിതം കൊണ്ട് അവരാര്‍ജ്ജിച്ചെടുത്ത അറിവിനെയും നമ്മള്‍ പല ബ്രാന്‍ഡ്‌ നെയിമുകളില്‍ 'കര്‍ക്കടകക്കഞ്ഞി കിറ്റു'കളാക്കിയെന്നത്‌ മറ്റൊരു കഥ!
നമ്മുടെ നാട്ടില്‍ സാധാരണക്കാര്‍ ശീലിച്ചിരുന്ന ഒരു കര്‍ക്കിടകക്കഞ്ഞിക്കൂട്ടാണു ചുവടെ രേഖപ്പെടുത്തുന്നത്‌. കഴിഞ്ഞുപോയ ഒരു കൊല്ലത്തിലെ ഓരോ മാസത്തിലും ശരീരത്തിനുണ്ടായ ദോഷങ്ങള്‍ക്കു പരിഹാരമായി ഓരോ ഔഷധങ്ങള്‍ ചേര്‍ക്കുന്നു എന്നു സങ്കല്‍പ്പം.
1. ചിങ്ങം - മുക്കുറ്റി
2. കന്നി - കീഴാര്‍നെല്ലി
3. തുലാം - ചെറൂള (വേര്‌)
4. വൃശ്ചികം - തഴുതാമ (വേര്‌)
5. ധനു - മുയല്‍ചെവിയന്‍
6. മകരം - കുറുന്തോട്ടി (വേര്‌)
7. കുംഭം - ബലിക്കറുക
8. മീനം - ചെറുകടലാടി
9. മേടം - പൂവാംകുറുന്നില (വേര്‌)
10. ഇടവം - കക്കും കായ
11. മിഥുനം - ഉലുവ
12. കര്‍ക്കടകം - ആശാളി
(ഇതില്‍ കക്കും കായയുടെ പരിപ്പ്‌ 24 മണിക്കൂര്‍ വെള്ളത്തിലിട്ട്‌ കട്ട്‌ കളഞ്ഞെടുക്കണം)
പ്രായപൂര്‍ത്തിയായ ഒരാള്‍ക്ക്‌ ഓരോന്നും 5 ഗ്രാം എന്ന കണക്കില്‍ ആകെ (12x5) 60 ഗ്രാം ചതച്ച്‌ കിഴികെട്ടി ഉണക്കലരി കഞ്ഞിവച്ച്‌ കര്‍ക്കടകമാസം മുഴുവന്‍ കഴിക്കാം.
കടപ്പാട് : സ്വാമി നിര്‍മ്മലാനന്ദഗിരി മഹരാജ്‌
Wednesday, July 15, 2009
കര്‍ക്കടകക്കഞ്ഞി കുടിക്കാം...
Posted by വിപിന്‍ at 9:55 PM 7 comments
Tuesday, June 23, 2009
ഗൃഹവൈദ്യം - 2
കൊളസ്ട്രോള് കുറയാന്‍ (അമിതവണ്ണം കുറയാനും...)
പാല്‍ ഉറയൊഴിച്ചു വച്ച്‌ രാവിലെ അതിനുമുകളില്‍ കാണുന്ന തെളി ഊറ്റിയെടുത്ത്‌ വെറുംവയറ്റില്‍ കുടിക്കുക. അത്യാവശ്യം ഉപ്പ്‌ ചേര്‍ക്കാം. ഒരുമാസം തുടര്‍ച്ചയായി ചെയ്താല്‍ അത്ഭുതകരമായ ഫലമുണ്ടാവുമെന്ന് അനുഭവസ്ഥര്‍.
അലര്‍ജി - തുമ്മല്‍, ചൊറിച്ചില്‍...
1. മഞ്ഞളും കറിവേപ്പിലയും (തുല്യം) നന്നായി അരച്ചുരുട്ടി ഒരുനെല്ലിക്കയോളം എല്ലാ ദിവസവും രാവിലെ വെറും വയറ്റില്‍ കഴിക്കുക. ഗുണമുണ്ടാവുമെന്ന് അനുഭവം.
2. ഒരുപിടി ചുവന്ന തുളസിയില ചതച്ചു നീരെടുത്ത്‌ കരിക്കിന്‍ വെള്ളത്തില്‍ ചേര്‍ത്ത്‌ ദിവസം ഒരുനേരം ഒരാഴ്ച്ച കഴിക്കുക.*
തേയില മാഹാത്മ്യം.
1. കട്ടന്‍ചായയില്‍ നാരങ്ങാനീരും അല്‍പ്പം ഉപ്പും ചേര്‍ത്ത്‌ കഴിച്ചാല്‍ വയറ്റിളക്കം (വയറുകടി) മാറും
2. ചെറു ചൂടുള്ള കട്ടന്‍ ചായയില്‍ ഉപ്പുചേര്‍ത്തു കവിള്‍കൊള്ളുന്നത്‌ (Gargle) തൊണ്ടവേദനയ്ക്ക്‌ പരിഹാരമാണ്‌
3. കട്ടന്‍ ചായ കൊണ്ട് തലമുടികഴുകുന്നത്‌ മുടിക്ക്‌ തിളക്കവും ഭംഗിയും നല്‍കും.
അതിസാരം
1. കറിവേപ്പില ഒരുപിടി നന്നായരച്ച്‌ കോഴിമുട്ടയില്‍ ചേര്‍ത്ത്‌ പച്ചയായോ പൊരിച്ചോ കഴിക്കുക. (ആവശ്യമെങ്കില്‍ 2-3 നേരം കഴിക്കണം)*
2. ഇഞ്ചി ഇടിച്ചുപിഴിഞ്ഞ്‌ ഊറല്‍ മാറ്റി 1 ടീസ്പൂണ്‍ എടുത്ത്‌ ഒരു നുള്ള്‌ കറിയുപ്പ്‌ പൊടിച്ചു ചേര്‍ത്ത്‌ പല പ്രാവശ്യം കഴിക്കുക.*
മാസമുറ തുടങ്ങാത്ത കൗമാരക്കാര്‍ക്ക്‌...
അഞ്ചിതളുള്ള ചുവന്ന നാടന്‍ ചെമ്പരത്തിയുടെ പൂവ്‌ 4 എണ്ണം നന്നായരച്ച്‌ കാടിയില്‍ ചേര്‍ത്ത്‌ കൊടുത്താല്‍ അല്‍ഭുതകരമായ ഫലമുണ്ടാവും. (ഗര്‍ഭിണിക്കു കൊടുത്താല്‍ ഗര്‍ഭം അലസും. അതുകൊണ്ടാണ്‌ ഗര്‍ഭിണി ചെമ്പരത്തി താളിപോലും ഉപയോഗിക്കരുതെന്നു പറയുന്നത്‌)
- By സ്വാമി നിര്‍മ്മലാനന്ദഗിരി മഹരാജ്‌
ഇക്കിള്‍ (എക്കിട്ടം)
1. ശ്വാസകോശം നിറയുവോളം ശ്വാസം ഉള്ളിലേക്കെടുക്കുക. പരമാവധി സമയം ഉള്ളില്‍ നിര്‍ത്തിയ ശേഷം വളരെ സാവധാനം ഉച്‌ഛ്വസിക്കുക. ഇക്കിള്‍ മാറും.
2. വായില്‍ പഞ്ചസാര ഇട്ടതിനു ശേഷം ഒന്നോ രണ്ടോ മിനിട്ട്‌ കൊണ്ട് കുറേശ്ശെയായി അലിയിച്ചിറക്കുക.
3. ചുക്ക്‌ അരച്ച്‌ തേനില്‍ ചാലിച്ച്‌ കഴിക്കുക. ക്ഷണത്തില്‍ മാറും.*
ഉറക്കക്കുറവ്‌
ഒരു ഗ്ലാസ്‌ ചൂടുവെള്ളത്തില്‍ ഒരു ടീസ്പൂണ്‍ തേന്‍ ചേര്‍ത്ത്‌ രാത്രി കിടക്കുന്നതിനു മുന്‍പ്‌ കഴിക്കുക.
കുഴിനഖം
1. മയിലാഞ്ചിയും പച്ചമഞ്ഞളും അരച്ച്‌ കുഴിനഖത്തിനു ചുറ്റും പൊതിയുക.
2. കുഴിനഖമുള്ള ഭാഗത്ത്‌ എരുക്കിന്റെ കറ വീഴ്ത്തുക.
3. ചെറുനാരങ്ങയില്‍ കുഴിയുണ്ടാക്കി വിരല്‍ അതില്‍ തിരുകി വയ്ക്കുക.
അമ്ലപിത്തം- Acidity (പുളിച്ചുതികട്ടല്‍...)
1. വേപ്പില 10ഗ്രാം അരച്ച്‌ മോരില്‍ കലക്കി കുടിക്കുക.*
2. പച്ച നെല്ലിക്ക കുരു കളഞ്ഞ്‌ (6 ഗ്രാം) നീരെടുത്ത്‌ ഒരു ഗ്ലാസ്സ്‌ പാലില്‍ കലക്കി ദിവസം 2 നേരം കുടിക്കുക.*
കൃമിശല്യം
1. ഒരു ടീസ്പൂണ്‍ തേന്‍, നന്നായി വിളഞ്ഞ തേങ്ങയുടെ വെള്ളത്തില്‍ കലക്കി കഴിക്കുക.*
2. 25ഗ്രാം ഇഞ്ചി കുത്തിപ്പിഴിഞ്ഞ നീരില്‍ സമം ചുവന്നുള്ളി നീരു ചേര്‍ത്ത്‌ അല്‍പ്പനേരം വച്ച്‌ ഊറല്‍ കളഞ്ഞശേഷം ചെറുതേന്‍ ചേര്‍ത്ത്‌ രാത്രി കിടക്കാന്‍ നേരം കഴിക്കുക. ഇതു വിരയുടെയും കൊക്കപ്പുഴുവിന്റെയും ഉപദ്രവത്തിനും ഫലം ചെയ്യും.*
ശരീരപുഷ്ടിയുണ്ടാവാന്‍
1. അരലിറ്റര്‍ തേനില്‍ കാല്‍ കിലോ ഈന്തപ്പഴം ഇട്ടു വെയിലത്ത്‌ വച്ച്‌ വറ്റിക്കുക. തേന്‍ മുഴുവന്‍ ഈന്തപ്പഴത്തില്‍ പിടിച്ചതിനു ശേഷം ഒരു ഭരണിയിലാക്കി സൂക്ഷിക്കുക. ദിവസവും രാവിലെയും വൈകീട്ടും ഇതില്‍ 4 ഈന്തപ്പഴം വീതം കഴിച്ച്‌ ഒരു ഗ്ലാസ്സ്‌ പാല്‍ കുടിച്ചു ശീലിച്ചാല്‍ ശരീരം പുഷ്ടി പ്രാപിക്കും.*
2. രാവിലെ വെറുംവയറ്റില്‍ ഒരു ഗ്ലാസ്‌ തൈര്‌ പഞ്ചസാര ചേര്‍ത്ത്‌ കഴിക്കുക.
ആസ്ത്‌മയ്ക്ക്‌
1. "ഒരു കോഴിമുട്ട പൊട്ടിക്കാതെ ഒരു ഗ്ലാസ്സില്‍ വയ്ക്കുക. അതു മൂടത്തക്കവിധം ചെറുനാരങ്ങാനീരൊഴിച്ച്‌ 24 മണിക്കൂര്‍ വയ്ക്കുമ്പോള്‍ മുട്ടയുടെ തോട്‌ അലിയും. മുട്ടയുടെ തോടും അകത്തുള്ളവയും ചെറുനാരങ്ങാനീരും എല്ലാം കൂടി നന്നായി പിഴിഞ്ഞരിച്ച്‌ ഒരു പാത്രത്തില്‍ വയ്ക്കുക. തുല്യഅളവില്‍ ചെറുതേന്‍ ചേര്‍ത്തിളക്കി അടുപ്പത്തുവച്ച്‌ ഒന്നു തിളയ്ക്കുമ്പോള്‍ എടുത്ത്‌ സൂക്ഷിച്ചു വച്ച്‌ ദിവസവും കാലത്തും വൈകീട്ടും ഓരോ വലിയ സ്പൂണ്‍ വീതം കഴിക്കുക. അങ്ങനെ 7 മുട്ട കഴിക്കുമ്പോള്‍ ആസ്മ നിശ്ശേഷം പോകുമെന്ന് അനുഭവസ്ഥര്‍ പറയുന്നു. ഒരുപ്രാവശ്യം ഒരു മുട്ട മാത്രം പാകം ചെയ്യുക. കുട്ടികള്‍ക്ക്‌ കുറച്ചു കൊടുക്കുക." - 'ഗൃഹവൈദ്യം' (DC Books) By പി.വി.തോമസ്‌.
2. തൊട്ടാവാടി സമൂലം അരച്ച്‌ (ഒരു നെല്ലിക്കാ പ്രമാണം) തേങ്ങാപ്പാലില്‍ കലക്കി 15 ദിവസം തുടരെ കഴിക്കുക.*
3. രണ്ടു ടീസ്പൂണ്‍ തുളസി നീര്‌ സമം തേന്‍ ചേര്‍ത്ത്‌ രാവിലെ വെറും വയറ്റില്‍ മുടങ്ങാതെ സേവിക്കുക.*
അര്‍ശസ്സ്‌
പെരിങ്ങല (പെരുവലം, ഒരുവേരന്‍)ത്തിന്റെ വേര്‌ ചതച്ചിട്ട്‌ പശുവിന്‍പാല്‍ കാച്ചി കുടിക്കുക.
പെരിങ്ങലത്തിന്റെ ഇല ചതച്ച്‌ ഗുദഭാഗത്ത്‌ വച്ച്‌ ശീലയുടുക്കുന്നതും ഏറെ ഗുണം ചെയ്യും.*
പുഴുക്കടിക്ക്‌
1. കുടങ്ങലി (കുടകന്‍, മുത്തിള്‍)ന്റെ ഇലയും പച്ച മഞ്ഞളും കൂടി അരച്ച്‌ പുരട്ടുക.*
2. പച്ചമഞ്ഞളും വേപ്പിലയും കൂടി അരച്ച്‌ പുരട്ടുക.
ചൊറിച്ചില്‍
ശരീരം ചൊറിഞ്ഞ്‌ തടിച്ചുപൊങ്ങുന്നതിന്‌ ആവണക്കെണ്ണ (Castor Oil) പുരട്ടുക. വളരെ ഫലപ്രദം.
*ചില വൈദ്യഗ്രന്ഥങ്ങളില്‍ നിന്ന്...
Posted by വിപിന്‍ at 10:38 PM 13 comments
Tuesday, June 2, 2009
ഗൃഹചികിത്സാവിധികളെപ്പറ്റി...
“സ്വാസ്ഥ്യം” ആരംഭിച്ചതു മുതല്‍ അത് ഏറെ പരിഹാസങ്ങള്‍ക്കും, വിമര്‍ശനങ്ങള്‍ക്കും വിധേയമായിട്ടുണ്ട്.
പ്രധാന ആരോപണം, ക്ലിനിക്കല്‍ ട്രയല്‍‌സ് ഒന്നും നടത്തിയിട്ടില്ലാത്ത, യാതൊരു ഫലസിദ്ധിയും തെളിയിക്കപ്പെടാത്തവയാണ് ഇവിടെ നല്‍കിയിരിക്കുന്ന ഗൃഹ വൈദ്യക്കുറിപ്പുകള്‍ എന്നതാണ്.
നേരത്തെ പരാമര്‍ശിച്ചതുപോലെ, നമ്മുടെ മാതാപിതാക്കളും, പിതാമഹന്മാരും സ്വന്തം ജീവിതത്തിലൂടെ ക്ലിനിക്കല്‍ ട്രയല്‍‌സ് നടത്തിയാണ് ഇവയൊക്കെ പുതിയ തലമുറകള്‍ക്ക് കൈമാറിയിട്ടുള്ളത് എന്നു ഞാന്‍ കരുതുന്നു. അറുപതു വയസ്സു കഴിഞ്ഞ അപ്പൂപ്പനോ അമ്മൂമ്മയോ വീട്ടിലുണ്ടെങ്കില്‍ ഈ ചുറ്റിനും കാണുന്ന ഇഞ്ചിക്കും, വെളുത്തുള്ളിക്കും, ഉലുവയ്ക്കും, കറിവേപ്പിലയ്ക്കുമെല്ലാം എന്തെങ്കിലും ഔഷധ ഗുണമുണ്ടോ എന്ന് മുന്‍‌ധാരണയില്ലത്ത മനസ്സോടെ ആരാഞ്ഞറിയാവുന്നതാണ്.
ഇവയൊന്നും ഒരു പക്ഷേ ആഗോളതലത്തില്‍ അംഗീകരിക്കപ്പെട്ടിട്ടുള്ള മെഡിക്കല്‍ ജേര്‍ണലുകളിലൊന്നും പ്രകാശിക്കപ്പെട്ടിരിക്കില്ല. എന്നാല്‍ ഈ മണ്ണില്‍ ജനിച്ചു ജീവിച്ചു മരിച്ച ഒരു നൂറു തലമുറകള്‍ സ്വന്തം ജീവനത്തെക്കുറിച്ചുള്ള അവരുടെ ഗവേഷണത്തില്‍ സ്വയം തിരിച്ചറിഞ്ഞ സത്യങ്ങള്‍ പുതു തലമുറകള്‍ക്ക് വാമൊഴിയിലൂടെ പകര്‍ന്നതാണ് ഈ നാട്ടറിവുകള്‍ എന്ന എന്റെ വിശ്വാസത്തോട് ഈ ബൂലോകത്തെ ചിലര്‍ക്കെങ്കിലും യോജിക്കാന്‍ കഴിയുമെന്നു കരുതുന്നു. മറ്റെന്തു ലോകവ്യവഹാരവും പോലെ ഈ രംഗത്തും കള്ളനാണയങ്ങളില്ല എന്ന മൂഢധാരണയൊന്നും എനിക്കില്ല.
ഭാരതീയനു പൈതൃകമായിക്കിട്ടിയ വിജ്ഞാനസമ്പത്തിനെപ്പറ്റിയുള്ള അറിവില്ലായ്മയും ഒരു പരിധിവരെ ഇത്തരം നാട്ടറിവുകളെ കണ്ണുമടച്ചു പുശ്ഛിക്കുവാന്‍ നമ്മെ പ്രേരിപ്പിക്കുന്നുണ്ടെന്നു തോന്നുന്നു. വൈദേശികമായ അറിവു മാത്രമാണ് സത്യസന്ധവും ആശ്രയിക്കാവുന്നതും എന്ന ധാരണയും നമുക്കില്ലാതില്ല.
പ്രമുഖ ആയുര്‍വ്വേദ പണ്ഡിതനും പാശ്ചാത്യ പൌരസ്ത്യ ശാസ്ത്രശാഖകളില്‍ പരിനിഷ്ണാതനുമായ സ്വാമി നിര്‍മ്മലാനന്ദഗിരി മഹാരാജിന്റെ ഒരു പ്രഭാഷണം ദാ ഇവിടെ (3ഭാഗങ്ങളായി) കേള്‍ക്കാം. ഓണ്‍ലൈനില്‍ കേള്‍ക്കാന്‍ സൌകര്യമില്ലാത്തവര്‍ക്ക് ഡൌണ്‍ലോഡ് ചെയ്തും കേള്‍ക്കാവുന്നതാണ്.
ഒരുപക്ഷേ നമ്മുടെ ചില അബദ്ധധാരണകള്‍ തിരുത്താന്‍ അതു പര്യാപ്തമായേക്കും..
“നഹി ജ്ഞാനേന സദൃശം പവിത്രമിഹ വിദ്യതേ” (ഭഗവദ് ഗീത)
കടപ്പാട്: നിര്‍മ്മലവീചികള്‍ by അശോക്
Labels: ആയുര്വ്വേദം, ഗൃഹചികിത്സ
Posted by വിപിന്‍ at 1:57 AM 14 comments
Tuesday, May 26, 2009
ഗൃഹ വൈദ്യം - 1
പ്രമേഹത്തിന്‌
അര ഔണ്‍സ്‌ ഇഞ്ചി നീരില്‍ ഒരു ടീസ്പൂണ്‍ ഉലുവപ്പൊടി ചേര്‍ത്ത്‌ രാവിലെ വെറും വയറ്റില്‍ സ്ഥിരമായി കഴിച്ചാല്‍ പ്രമേഹത്തിന്‌ ശമനമുണ്ടാകും.
ശരീരപുഷ്ടിക്ക്‌
ഉലുവ തലേന്ന് വെള്ളത്തില്‍ കുതിര്‍ത്തു വച്ച്‌ രാവിലെ പിഴിഞ്ഞ്‌ ആ സത്ത്‌ കുടിക്കുക.
കുഞ്ഞിനു നിറവും ആരോഗ്യവും
ഗര്‍ഭ കാലത്ത്‌ സ്ത്രീകള്‍ ദിവസവും ഈന്തപ്പഴം കഴിച്ചാല്‍ ശിശു ആരോഗ്യത്തോടും നല്ല നിറത്തോടും കൂടിയതാകും.
ബുദ്ധി, ഓര്‍മ്മ, ഉണര്‍വ്വ്‌
രണ്ടു നുള്ള്‌ ഏലക്കാ പൊടി ഒരു ഗ്ലാസ്‌ പലില്‍ തിളപ്പിച്ച്‌, തണുപ്പിച്ച്‌ മധുരത്തിനു തേന്‍ ചേര്‍ത്ത്‌ ദിനവും രാത്രി കുടിക്കുക.
താരന്‍, പേന്‍ എന്നിവയ്ക്ക്‌
കറിവേപ്പിലയുടെ കുരു ചെറുനാരങ്ങാനീരില്‍ അരച്ച്‌ തലയില്‍ തേച്ച്‌ അരമണിക്കൂറിനു ശേഷം കുളിക്കുക. നിശ്ശേഷം മാറും
ഓക്കാനവും ഛര്‍ദ്ദിയും മാറാന്‍
അര ഔണ്‍സ്‌ ഇഞ്ചിനീരും സമം ഉള്ളിനീരും ചേര്‍ത്ത്‌ കഴിക്കുക.
തൊണ്ടവേദന, ജലദോഷപ്പനി
ഇവ വരാന്‍ സാധ്യതയുണ്ടെന്നു തോന്നുമ്പോള്‍ തന്നെ ചെറുനാരങ്ങാനീര്‌ ചൂടുവെള്ളത്തില്‍ ചേര്‍ത്ത്‌ കഴിച്ചാല്‍ മതി.
പ്രോസ്‌ട്രേറ്റ് വീക്കം
ചക്കയുടെ മുള്ളു പോലുള്ള പുറം തൊലി മുറിച്ചെടുത്ത്‌ കഴുകി ഉണക്കിപ്പൊടിച്ച്‌ 10 ഗ്രാം വീതം ദിവസവും രണ്ടു നേരം ചൂടുവെള്‍ലത്തില്‍ ചേര്‍ത്തു കഴിച്ചാല്‍ അതിശയകരമായ ഫലമുണ്ടാകും -3 മാസം കഴിക്കണം.
മലബന്ധത്തിന്‌
റോസാപ്പൂവിന്റെ ഇതള്‍ പഞ്ചസാരകൂട്ടി കഴിച്ചാല്‍ മലബന്ധം പോകും- ആസ്ത്‌മയ്ക്കും ഫലപ്രദം.
അതിസാരം
ഒരു നാരങ്ങയുടെ നീരെടുത്ത്‌ അല്‍പ്പം എള്ളെണ്ണ ചേര്‍ത്ത്‌ അരിച്ച്‌ കുരു മാറ്റി നന്നായി അടിച്ചു യോജിപ്പിച്ചു കുടിച്ചാല്‍ അതിസാരം നില്‍ക്കും.
കൊളസ്ട്രോള്
കറിവേപ്പില അരച്ച്‌ ഒരു നെല്ലിക്കയോളം എടുത്ത്‌ അതിനൊപ്പം ജാതിപത്രി അരച്ച്‌ രണ്ടു നേരം കഴിച്ചാല്‍ കൊളസ്ട്രോള് പെട്ടെന്നു താഴും.
ഗര്‍ഭിണികള്‍ ഒഴിവാക്കേണ്ടവ
കടല, എള്ള്‌, പഴുത്തകൈതച്ചക്ക, മുട്ട (അധികം)
Posted by വിപിന്‍ at 10:47 PM 40 comments
സ്വാസ്ഥ്യം എന്നാല്‍....
മണ്മറഞ്ഞുപോയ നമ്മുടെ പൂര്‍വ്വികര്‍ കണ്ടെത്തിയതും തിരിച്ചറിഞ്ഞതുമായ ചില നാട്ടറിവുകളും ശുഭജീവന രഹസ്യങ്ങളും ശേഖരിക്കാനും രേഖപ്പെടുത്തി വയ്ക്കാനുമുള്ള ഒരെളിയ ശ്രമമാണിത്‌.
ആരോഗ്യം, രോഗചികിത്സ, കൃഷി, മൃഗസംരക്ഷണം തുടങ്ങി വിവിധ തലങ്ങളിലായി ഇത്‌ ഇവിടെ കുറിച്ചു വയ്ക്കാനാണു താല്‍പര്യം.
ഈ തലമുറയ്ക്കും വരും തലമുറകള്‍ക്കും ഇതുപകരിക്കട്ടെ എന്നു പ്രാര്‍ത്ഥന.
...............................................................................................................
ഋഷിപ്രോക്തമായ ആയുര്‍വ്വേദ സംഹിത, അഷ്ടാംഗഹൃദയം ഉപദേശിക്കുന്നു...
പൈശൂന്യം പരുഷാനൃതം
സംഭിന്നാലാപം വ്യാപാദ-
മഭിധ്യാം ദൃഗ്വിപര്യയം
പാപം കര്‍മ്മേതി ദശധാ
കായ വാങ്ഗ്‌മനസ്ത്യജേല്‍"
അതെ, മനസ്സിലും വാക്കിലും നിറയുന്ന ശുഭചിന്തകള്‍ തന്നെയാണ്‌ സൗഖ്യജീവനത്തിന്റെ അഥവ സ്വാസ്ഥ്യത്തിന്റെ അടിസ്ഥാനം.
ഏവര്‍ക്കും സുസ്വാഗതം!
Labels: ആരോഗ്യം
Posted by വിപിന്‍ at 8:29 PM 14 comments
